اتفرجت النهاردة بالصدفة علي ماتش الأهلي المصري والترجي الرياضي التونسي في بطولة دوري أبطال أفريقيا - أنا بكتب بالعامية المرة ده بصراحة علي قد الحدث - أنا أصلا ما بتابعش كورة قدم لأندية مصرية ولكن الظروف إن كان واحد صاحبي جاي يتفرج عندي علي الماتش فقولت وليه لأ ما شوف الماتش ده أهو برضة في نصف نهائي أكبر بطولة للأندية في أفريقيا وبالمرة أشوف الفرق الأفريقية وصلت لفين في الكورة، المهم أنا لقيتها زي ماسبتها آخر مرة ... العشوائية لسه موجودة واللي لفت إنتباهي أكثر إن النادي الأهلي المصري مش زي الأول مالوش كورة معروفة يعني مافيش تاكتكس - مع ضرورة ذكر عدم إنتمائي لأي نادي محلي وده للي ما يعرفش - ........... بصراحة ده كانت ملاحظات كده سريعة بس أنا عاوز أتكلم علي حاجات تانية خالص، حاجات غريبة شوفتها وكالعادة لما بتفرج علي كورة قدم مصرية بشوف حاجات ما بشوفهاش في أي كورة قدم محترفة وغالبا بيكون ماتش زي ده بمثابة فيلم كوميدي بالنسبالي .... أول حاجة : وارد إن لاعب يدخل الكورة يإيدة جوة المرمي وحصلت كثير وأشهرها جوول مارادونا في نهائيات كأس العالم قدام إنجلترا، بس ديجو طلع بعد الماتش وقال ده إيد ربنا اللي دخلت الكورة مش إيدي، بس أعترف أن في إيد دخلت الكورة، وبعد كده حصلت واقعة فريدة من نوعها من لاعب نادي روما الإيطالي دي روسي لما دخل جوول بإيدة قدام نادي ليتشي والحكم حسبة - طبعا كل الأخطاء ده تحكيمية ولكنها مقبولة لأنها جزء من كورة القدم - لكن دانييلي راح للحكم وقالة يلغي الجوول علشان دخلة بإيدة والحكم إستجابلة وشكرة ولاعبين الخصم صقفولوا وحتي مدربة وقتها سباليتي أثني عليه تصرفة ده، وأخيرا كانت واقعة هنري لما مهد الكورة بإيدة لجالاس في ماتش منتخب فرنسا قدام جمهورية أيرلندا في الملحق الأوروبي لتصفيات كأس العالم 2010 والجوول ده كان رشح فرنسا علي حساب أيرلندا، بعدها قال تيري إنة لمس الكورة بإيدة وحزين لده وأن من العدل إعادة الماتش - طبعا الفيفا لم يستجيب لمحاولات الإتحاد الأيرلندي لكرة القدم بإعادة الماتش لإن زي ما قولت الأخطاء التحكيمية جزء من الكورة وده وارد يحصل بدون تعمد من الحكام - الخلاصة هنا إن وارد ده يحصل بس الإعتراف به حاجة مهمة، بس أنا بقي شوفت حاجة غريبة في الماتش ده، شوفت لاعب الأهلي محمد فضل دخل جوول بإيدة وبعدها سجد يشكر ربنا !!!!!! بصراحة مش عارف علي إية، يمكن علشان إدالة جوول غير شرعي ومش من حقة ..... حاجة غريبة جدا، مش هنقول يروح للحكم يقولة يلغي الجوول زي ما ناس عملت قبل كده في العالم، بس أوكي جوول وخلاص يفرح حتي بس لكن يسجد لربنا .... ربما تصرف شخص غير مسلم أفضل بكثير من تصرف مسلم خاطيء من خلال دينة ................ الحاجة التانية : لاعب الأهلي فرانسيس إتخبط في وشة ونزل دم، فضل ينزف لفترة ودكتور الفريق مش عارف يوقفلة النزيف - بيقولوا أن الدكتور أحمد ماجد ده أفضل دكتور للاندية في مصر - في حين إن حاجة زي ده في العالم سهلة جدا والنزيف بيقف في 5 ثواني تقريبا ويرجع اللاعب يكمل عادي حتي لو كان ده فتح كمان مش مجرد نزيف، بس اللي حصل حاجة غريبة إن اللاعب إتبدل علشان النزيف ماوقفش ...... تالت حاجة والأخيرة هي حاجة بقت عادية دلوقتي في المسابقات ده ومش هتتغير لإنها مرتبطة بثقافة جمهور وهي إستخدام أشعة الليزر للشوشرة علي اللاعبين ومابيحصلش أي تدخل من الإتحادات الكروية في بلادنا عليها، مع ضروروة ذكر إن حاجة زي كده حصلت في الدوري الإيطالي الموسم اللي فات من جمهور فريق نابولي في ماتشة قدام نادي روما، وبعدها الإتحاد الإيطالي غرم نادي نابولي غرامة مالية ومنع جمهور النادي من مصاحبة فريقة لماتشات جاية، وبرضة في كأس العالم للشباب الأخيرة اللي إتنظمت في مصر إستخدم الجمهور المصري الليزر في مباراة فريقة قدام كوستاريكا في الدور التاني للبطولة وساعتها أعلن المذيع الداخلي إن في حالة إستخدام الليزر مرة تانية هيتحسب الماتش لمنتخب كوستاريكا - طبعا علشان البطولة ده تحت مظلة الفيفا - ........ معلش أنا طولت عليكوا بس الكلام ده كنت لازم أقولة علشان اللي ما يعرفش يعرف وعلشان أحرم أتفرج علي كورة لأندية مصرية زي ما بقول كل مرة
SH13
